xtreme2day 01-08-2024 22:00:48 7089444
नातवानं करून दावलं, समोर आला की मुकाच घेणार… पदकवीर स्वप्नील कुसळे याच्या आजीचा आनंद गगनात मावेना ! पॅरिस ऑलिम्पिकमध्ये भारताला तिसरे पदक ; स्टार नेमबाज स्वप्नील कुसळे याने कांस्यपदक पटकावले ! नवी दिल्ली (विशेष प्रतिनिधी) - पॅरिस ऑलिम्पिकमध्ये भारताला तिसरे पदक मिळाले. आज (१ ऑगस्ट) कोल्हापूरचा स्टार नेमबाज स्वप्नील कुसळे याने कांस्यपदक पटकावले. स्वप्नीलने ५० मीटर रायफल थ्री पोझिशनमध्ये ४५१.४ गुण नोंदवून इतिहास रचला. पॅरिस ऑलिम्पिकमधील भारताचे हे एकूण तिसरे पदक आहे. यापूर्वी मनू भाकरने वैयक्तिक आणि सरबज्योत सिंगसोबत सांघिक इव्हेंटमध्येे कांस्यपदक पटकावले होते. कोल्हापूरच्या स्वप्नील कुसळे याने कांस्य पदकाची कमाई केली. खाशाबा जाधव यांच्यानंतर ऑलिम्पिक पदक जिंकणारा स्वप्नील हा दुसरा मराठी खेळाडू आहे. स्वप्नील कुसळे हा मुळचा कोल्हापूरच्या राधानगरी तालुक्यातील कांबळवाडी गावचा आहे. तो शेतकरी कुटूंबातून इथवर पोहोचला आहे. स्वप्नीलच्या या ऐतिहासिक यशानंतर त्याच्या परिवारातून प्रतिक्रिया आली आहे. स्वप्नीलचे वडील सुरेश कुसळे आणि आई अनिता कुसळे यांच्या डोळ्यात आनंदश्रु होते. स्वप्नील इतिहास घडवेल, अशी दोघांनाही खात्री होती. तर स्वप्नीलच्या आजीने खास कोल्हापूरी भाषेत प्रतिक्रिया दिली. स्वप्नीलची आजी म्हणाली, नातवानं करून दावलं, चांगलंच हायं की, आता समोर आल्यावर त्याचा मुकाच घेणार". दरम्यान, १७ मे २०२४ रोजी भोपाळ येथे झालेल्या अंतिम निवड चाचणीमध्ये स्वप्नील २०२४ च्या ऑलिम्पिकसाठी पात्र ठरला. १९९५ मध्ये जन्मलेला स्वप्नील शेतकरी कुटुंबातून इथवर पोहोचला आहे. स्वप्नीलने ५० मीटर रायफल स्पर्धेत चमकदार कामगिरी करत एकूण ४५१.४ इतका स्कोअर केला. चीनचा लिऊ युकुन अव्वल स्थानावर राहिला. त्याचा स्कोर ४६३.६ होता. तर युक्रेनच्या कुलिस सेरहीने दुसरा क्रमांक पटकावला. विशेष म्हणजे, एखाद्या भारतीय नेमबाजाने ५० मीटर रायफल थ्री पोझिशन स्पर्धेत पदक जिंकण्याची ही पहिलीच वेळ आहे. तसेच, खाशाबा जाधव यांच्यानंतर ऑलिम्पिक पदक जिंकणारा स्वप्नील कुसळे हा केवळ दुसरा मराठी खेळाडू आहे. खाशाबा जाधव यांनी १९५२ मध्ये कुस्तीत ऑलिम्पिक पदक पटकावले होते. स्वप्नीलपूर्वी मनू भाकरने महिलांच्या १० मीटर एअर पिस्तूल प्रकारात कांस्यपदक जिंकले होते. त्याचवेळी सरबजोतसह मनूने १० मीटर एअर पिस्तूल मिश्र प्रकारात कांस्यपदक जिंकले.अशा प्रकारे पॅरिस ऑलिम्पिक २०२४ मध्ये आतापर्यंत भारताच्या खात्यात तीन पदकं आली आहे. स्वप्नील कुसळे हा त्याच्या शांत स्वभावासाठी ओळखला जातो. पण आता पदक जिंकल्यानंतर सोशल मीडियावर त्याच्या अभिनंदनाचा महापूर आला आहे. विशेष म्हणजे तो एमएस धोनीपासून प्रेरित आहे आणि महान भारतीय क्रिकेट कर्णधाराप्रमाणे तो रेल्वे तिकीट कलेक्टर देखील आहे.
