Xtreme Today 23-10-2026 20:49:04 725919512
मुंबई महापौर कार्यालय, अमिताभ बच्चन यांचे निवासस्थान आणि दिलजीत दोसांझ यांच्या कार्यक्रमावर हल्ल्याची धमकी देणारा ई-मेल मुंबई, (प्रतिनिधी) : मुंबईतील वांद्रे-कुर्ला संकुलातील (बीकेसी) एका अमेरिकन शाळेला धमकीचा ई-मेल प्राप्त झाला आहे. या धमकीनंतर संबंधित संदेशाची सत्यता पडताळून पाहण्यासाठी कायदा व सुव्यवस्था यंत्रणांनी व्यापक तपास सुरू केला आहे. या ई-मेलमध्ये बॉलिवूड अभिनेते अमिताभ बच्चन यांच्यासह अनेक सेलिब्रिटींचा उल्लेख करण्यात आला आहे. तसेच पंजाबशी संबंधित एका प्रकरणाचाही संदर्भ देण्यात आला आहे. मुंबई पोलीस ई-मेल पाठवणाऱ्या व्यक्तीचा शोध घेत आहेत. दरम्यान, बृहन्मुंबई महानगरपालिकेलाही (बीएमसी) आज याच स्वरूपाचा धमकीचा ई-मेल प्राप्त झाला. हा ई-मेल मिळाल्यानंतर पोलिसांनी परिसरात शोधमोहीम राबवली; मात्र कोणतीही संशयास्पद वस्तू आढळून आली नाही. यापूर्वी मार्च महिन्यात मुंबई प्रेस क्लबला अशाच प्रकारचा धमकीचा ई-मेल प्राप्त झाला होता, अशी माहिती एका अधिकाऱ्याने दिली. या ई-मेलमध्ये इमारतीच्या आत विषारी वायूने भरलेले अनेक छोटे बॉम्ब ठेवण्यात आल्याचा आणि ते २० मार्च रोजी दुपारी १ वाजता स्फोट घडवून आणतील, असा दावा करण्यात आला होता. नीराजा अजमल खान असे नाव सांगणाऱ्या एका व्यक्तीने हा ई-मेल पाठवल्याचा आरोप आहे. संबंधित व्यक्तीने प्रेस क्लबच्या इमारतीत विषारी वायूची तब्बल ४२ उपकरणे बसवण्यात आल्याचा दावा केला होता.
