माझ्या तोंडी वक्तव्याचा चुकीचा अर्थ लावून देशातील तरुणांची दिशाभूल करण्यासाठी वापर – सरन्यायाधीश सूर्यकांत

Xtreme Today   14-08-2026 19:55:25   379521496

माझ्या तोंडी वक्तव्याचा चुकीचा अर्थ लावून देशातील तरुणांची दिशाभूल करण्यासाठी वापर – सरन्यायाधीश सूर्यकांत

नवी दिल्ली (विशेष प्रतिनिधी) – न्यायालयीन कामकाजातील व्हिडिओ क्लिप योग्य संदर्भाशिवाय सोशल मीडियावर प्रसारित केल्या जात असल्याबद्दल चिंता व्यक्त करत भारताचे सरन्यायाधीश सूर्यकांत यांनी आपल्या तोंडी वक्तव्याचा “चुकीचा अर्थ लावण्यात आला” असून, देशातील तरुणांची दिशाभूल करण्यासाठी त्याचा “दुर्भावनापूर्ण हेतूने” गैरवापर करण्यात आल्याचे म्हटले आहे.

१५ मे २०२६ रोजी सर्वोच्च न्यायालयात एका प्रकरणाची सुनावणी करताना सरन्यायाधीशांनी बनावट पदव्या असलेल्या काही व्यक्तींची तुलना “झुरळांशी” केली होती. अशा व्यक्ती सोशल मीडिया किंवा आरटीआय कार्यकर्ते बनून व्यवस्थेवर हल्ला करतात, असे त्यांनी म्हटले होते. सरन्यायाधीशांच्या या वक्तव्यावर देशभरातील तरुणांमध्ये मोठी प्रतिक्रिया उमटली आणि त्यातून उपरोधिक स्वरूपाच्या ‘कॉक्रोच जनता पार्टी’ (CJP) या ऑनलाइन चळवळीला सुरुवात झाली.

डीडी न्यूजला दिलेल्या मुलाखतीत सरन्यायाधीश सूर्यकांत यांनी सांगितले की, सध्या न्यायालयीन कामकाजातील व्हिडिओ क्लिप योग्य संदर्भाशिवाय सोशल मीडियावर मोठ्या प्रमाणात प्रसारित केल्या जात आहेत.

सरन्यायाधीश म्हणाले की, जे काही घडले ते अत्यंत दुर्दैवी आहे आणि संबंधित व्यक्तींबाबत अशा प्रकारे बोलण्याची कल्पनाही ते करू शकत नाहीत.

“माझ्या वक्तव्याचा चुकीचा अर्थ लावण्यात आला आणि त्याचा गैरवापर करण्यात आला. जे बोलले गेलेच नाही, ते बोलल्याप्रमाणे सादर करण्यात आले. हे अत्यंत दुर्दैवी आहे. विशेषतः देशातील तरुणांची दिशाभूल करण्याचा हा मोठा आणि दुर्भावनापूर्ण प्रयत्न आहे,” असे सरन्यायाधीशांनी सांगितले.

न्यायालयीन कामकाजाचे वृत्तांकन करताना माध्यमांनी जबाबदारीने काम करावे, असे आवाहन करत सरन्यायाधीशांनी समाजातील सलोखा कायम राखणे ही प्रत्येक नागरिकाची जबाबदारी असल्याचे सांगितले.

ते म्हणाले, “तुम्ही सोशल मीडियावर असाल, प्रिंट मीडियामध्ये असाल, कोणत्याही प्रकारच्या माध्यमात असाल किंवा केवळ एक नागरिक असाल—आपल्या सर्वांना अधिकारांसोबतच घटनात्मक कर्तव्ये आणि जबाबदाऱ्याही आहेत. “जेव्हा आपण अधिकारांबद्दल बोलतो, तेव्हा आपल्या जबाबदाऱ्या पार पाडण्याची क्षमताही आपल्यात असली पाहिजे. त्यामुळे प्रत्येकाने आपल्या जबाबदाऱ्या लक्षात ठेवाव्यात. समाजात सलोखा कायम राहावा यासाठी आपण सर्वांनी अथक प्रयत्न केले पाहिजेत,” असे त्यांनी स्पष्ट केले.

NEET-UG पेपरफुटीविरोधात CJPच्या नेतृत्वाखाली जंतर-मंतर येथे महिन्याभराहून अधिक काळ सुरू असलेल्या आंदोलनादरम्यान २० जुलै रोजी आंदोलक आणि पोलिसांमध्ये झटापट झाली होती. या घटनेत दोन्ही बाजूंचे अनेक जण जखमी झाले होते. या आंदोलनानंतर केंद्रीय शिक्षणमंत्री धर्मेंद्र प्रधान यांनी आपल्या पदाचा राजीनामा दिला होता.

सरन्यायाधीशांनी न्यायालयीन कामकाजाच्या ऑडिओ-व्हिडिओ रेकॉर्डिंगचे अनधिकृत प्रसारण, पुनर्प्रसारण, अपलोडिंग आणि सोशल मीडिया तसेच इतर डिजिटल प्लॅटफॉर्मवर त्याचे व्यावसायिक स्वरूपात मुद्रीकरण करण्यास मनाई करणाऱ्या आपल्या अलीकडील आदेशाचाही उल्लेख केला.

भारताचे ५३ वे सरन्यायाधीश म्हणाले की, न्यायालयीन प्रक्रियेत पारदर्शकता आवश्यक आहे; मात्र तिचा व्यावसायिक गैरवापर होता कामा नये.

“न्यायव्यवस्थेत पारदर्शकता आणण्यासाठी आम्ही कटिबद्ध आहोत. पारदर्शकता असलीच पाहिजे. या दिशेने आणखी एक पाऊल म्हणून आम्ही सर्वोच्च न्यायालयातील सुनावणीचे थेट प्रक्षेपण सुरू केले.

“मात्र लाइव्ह स्ट्रीमिंगचा गैरवापर होता कामा नये. विशेषतः त्याचा व्यावसायिक वापर होऊ नये. काही लोक स्वतःच्या वैयक्तिक फायद्यासाठी किंवा व्यावसायिक फायद्यासाठी छोट्या क्लिप्सचा गैरवापर करतात. हे थांबले पाहिजे,” असे सरन्यायाधीश सूर्यकांत यांनी सांगितले.