सिजेपीच्या आवाहनानुसार महाराष्ट्र, बिहार, उत्तर प्रदेश, राजस्थान, हरयाणा ते बंगालपर्यंत; अवघ्या देशभरात विद्यार्थ्यांचा नीट पेपरफुटीच्या निषेधार्थ रस्त्यावर आक्रोशाचा वणवा, वकील सुद्धा आंदोलनात

Xtreme Today   24-07-2026 21:00:34   157364897

सिजेपीच्या आवाहनानुसार महाराष्ट्र, बिहार, उत्तर प्रदेश, राजस्थान, हरयाणा ते बंगालपर्यंत; अवघ्या देशभरात विद्यार्थ्यांचा नीट पेपरफुटीच्या निषेधार्थ रस्त्यावर आक्रोशाचा वणवा, वकील सुद्धा आंदोलनात

नवी दिल्ली (विशेष प्रतिनिधी) - सिजेपीच्या आवाहनानुसार महाराष्ट्र, बिहार, उत्तर प्रदेश, राजस्थान, हरियाणासह देशभरात संतापाचा उद्रेक झाला आहे. विद्यार्थ्यांच्या आंदोलनाला प्रतिसाद म्हणून पाटणामध्ये मोठा पोलीस बंदोबस्त तैनात करण्यात आला. बक्सरमधील विद्यार्थी पोस्टर आणि बॅनर घेऊन रस्त्यावर उतरले. राजस्थानच्या जयपूरमध्ये वकीलांनी धरणे आंदोलन केले. राजस्थान विद्यापीठाच्या विद्यार्थ्यांचे उपोषण सुरूच आहे. उत्तर प्रदेशातील प्रयागराजमध्ये वकिलांनी मोर्चा काढला. हरियाणाच्या चार जिल्ह्यांमध्ये वकील धरणे आंदोलनात सामील झाले. नीट पेपरफुटी आणि धर्मेंद्र प्रधान यांच्या राजीनाम्याच्या मागणीसाठी देशभरात आंदोलने होत आहेत.

महाराष्ट्रातील मुंबईत शिवसेना (उबाठा) व मनसेच्या नेत्यांनी स्वाक्षरी मोहीम राबवली तर पुण्यात हजारो विद्यार्थी एकत्र येऊन निषेध व्यक्त करताना दिसून आले. छत्रपती संभाजी नगर येथील वकिलांनी पाठिंबा देत मोर्चा काढला. बिहरमधील बक्सरमधील विद्यार्थी पोस्टर आणि बॅनर घेऊन रस्त्यावर उतरले. वैशालीमध्ये मोठ्या संख्येने आंदोलक घोषणाबाजी करत रस्त्यावर उतरले. यादरम्यान पंतप्रधान मोदी आणि केंद्रीय शिक्षणमंत्र्यांचे पुतळे जाळण्यात आले. समस्तीपूर-मधुबनी येथेही आंदोलने होत आहेत. पाटण्यातील आंदोलनांच्या पार्श्वभूमीवर आमदार आपल्या वाहनांवरील झेंडे काढून कामकाजासाठी आले. विधानसभा आणि रेल्वे स्थानकावर सुरक्षा वाढवण्यात आली आहे. रस्त्यावर दिसणाऱ्या विद्यार्थ्यांना थांबवून त्यांची चौकशी केली जात आहे. शहरात ध्वजसंचलन आयोजित करण्यात आले आहे.

दिल्लीतील जंतर मंतर येथे नीट पेपरफुटीविरोधात आंदोलन करणाऱ्या विद्यार्थ्यांवरील पोलीस कारवाईच्या निषेधार्थ राजस्थानातही निदर्शने झाली. जोधपूरमधील जिल्हाधिकारी कार्यालयासमोर आंदोलन सुरू असताना, युवक काँग्रेसच्या कार्यकर्त्यांनी बॅरिकेड्सवर चढण्याचा प्रयत्न केला, परंतु पोलिसांनी त्यांना मागे ढकलले. कार्यकर्ते आणि पोलिसांमध्ये झटापट झाली. राजस्थान उच्च न्यायालयाच्या जयपूर खंडपीठासमोर वकीलांनी केंद्र सरकारविरोधात धरणे आंदोलन केले. काँग्रेसच्या विधी विभागाशी संलग्न असलेल्या राजस्थान उच्च न्यायालयाच्या (जयपूर) वकिलांनी विद्यार्थ्यांच्या समर्थनार्थ पायी मोर्चा आयोजित केला. हा मोर्चा उच्च न्यायालयाच्या गेट क्रमांक 3 पासून आंबेडकर सर्कलपर्यंत सुरू राहिला. दरम्यान, विद्यार्थी नेता शुभम रेवाड जयपूरमधील राजस्थान विद्यापीठाच्या गेटवर उपोषणाला बसला आहे. आज त्यांच्या उपोषणाचा दुसरा दिवस आहे. विद्यार्थी त्यांच्या नेतृत्वाखाली आंदोलन करत आहेत. जयपूरच्या जवाहर सर्कल येथे जनरेशन-झेडचे सदस्यही आंदोलन करत आहेत. 

उत्तर प्रदेशात कॉकरोच जनता पक्षाच्या (सीजेपी) समर्थनार्थ विद्यार्थी आणि वकील रस्त्यावर उतरले. प्रयागराजमधील वकिलांनी, "ज्यांच्यावर लाठीचार्ज झाला, ती आमची मुले आहेत. आता लढा रस्त्यावर लढला जाईल," अशी घोषणा करत मोर्चा काढला. मेरठमध्ये सपा कार्यकर्त्यांनी केंद्रीय शिक्षण मंत्री धर्मेंद्र प्रधान यांची प्रतिकात्मक शवपेटी नेली. पोलिसांनी सपा कार्यकर्त्यांकडून ती प्रतिकात्मक शवपेटी हिसकावून घेतली आणि घेऊन गेले. यावेळी एक सपा कार्यकर्ता रस्त्यावर झोपला. पोलिसांनी त्याला उचलून नेले. कानपूरमध्ये सपाच्या एका आमदाराने ढोलक वाजवून आंदोलन केले. लखीमपूरमध्ये विद्यार्थी हातात तिरंगा आणि फलक घेऊन जिल्हाधिकारी कार्यालयापर्यंत पोहोचले. हरियाणात आंदोलने तीव्र झाली आहेत. हरियाणातील अनेक कलाकार, खेळाडू आणि प्रभावशाली व्यक्तीही जंतर मंतरवर पोहोचत आहेत. जेजेपीनेही आपले आंदोलन सिरसा येथून जंतर मंतरवर हलवले आहे. पंचकुलामध्ये वकिलांनी घोषणाबाजी करत जिल्हाधिकाऱ्यांच्या कार्यालयात प्रवेश केला. आयएनएलडीच्या कार्यकर्त्यांनी रोहतक, हिसार, भिवानी आणि यमुनानगर येथील जिल्हा बार असोसिएशनसमोर निदर्शने केली.