xtreme2day 28-11-2025 22:17:47 220360378
ग्राहक आहेत पण विक्रीसाठी सामानच नाही; देश दिवाळखोरीच्या उंबरठ्यावर, डोनाल्ड ट्रम्प यांनी त्यांच्याच देशाच्या व्यावसायिकांसमोर उभं केलं मोठं संकट! न्यूयॉर्क (एजन्सी वार्ता) - अमेरिकेचे अध्यक्ष डोनाल्ड ट्रम्प यांनी त्यांच्याच देशाच्या व्यावसायिकांसमोर संकट निर्माण केलं आहे. याचं प्रमुख कारण टॅरिफ आहे. ट्रम्प यांनी अन्य देशांवर लादलेल्या टॅरिफमुळे अमेरिकेतील किरकोळ विक्रेत्यांसमोर सुट्ट्यांच्या काळात पुरवठ्याची समस्या निर्माण झाली आहे. अनेक कंपन्यांकडे उत्पादनांचा साठा जवळपास संपत आला आहे. चीनमधून आयात होणाऱ्या उत्पादनांवर शुल्क वाढल्याने अनेक कंपन्यांकडे मालसाठा संपत आला आहे. अमेरिकन घायाळ झाले असून दिवाळखोरीची टांगती तलवार दिसून येत आहे. न्यूयॉर्कमधील स्लीप वेलनेस ब्रँड Loftie चे संस्थापक मॅट हॅसेट वर्षाच्या अखेरीस कायम व्यग्र असतात. पण यंदा परिस्थिती बिकट आहे. Loftie कंपनी सनराईज लॅम्प आणि फोन फ्री अलार्म क्लॉक चीनमधून मागवते. पण आता आयात शुल्कामुळे चीनमधून होणारा पुरवठा बाधित झाला आहे. आता हॅसेट यांच्याकडे अतिशय कमी सामान उरलं आहे. आम्हाला जितकं सामान हवं आहे, त्याच्या केवळ १० टक्केच आमच्याकडे उपलब्ध आहे, अशी माहिती हॅसेट यांनी दिली. डोनाल्ड ट्रम्प यांनी चीनवर लादलेलं टॅरिफ सतत बदललं. त्यामुळे अमेरिकेतील किरकोळ विक्रेत्यांसमोर मोठी समस्या निर्माण झाली. Loftie सारख्या लहान कंपन्या अडचणीत सापडल्या आहेत. एक तर भरमसाठ शुल्क मोजा किंवा नवा पुरवठादार शोधा, अशा विवंचनेत लहान कंपन्या अडकल्या आहेत. नोव्हेंबर आणि डिसेंबर हे दोन महिने अमेरिकेतील किरकोळ विक्रेत्यांसाठी महत्त्वाचे असतात. या दोन महिन्यांत विक्रेते त्यांच्या वार्षिक नफ्याच्या एक तृतीयांश नफा कमावतात.
