आपल्या वस्तु चीनला विकायच्या असतील तर उत्पन्नाचा वाटा अमेरिकन सरकारला देण्याचे ट्रम्प यांचे देशातील कंपन्यांना आदेश

xtreme2day   12-08-2025 21:43:46   24271105

आपल्या वस्तु चीनला विकायच्या असतील तर उत्पन्नाचा वाटा अमेरिकन सरकारला देण्याचे ट्रम्प यांचे देशातील कंपन्यांना आदेश 

वॉशिंग्टन (एजन्सी वार्ता) - एकीकडे अमेरिकेचे राष्ट्राध्यक्ष डोनाल्ड ट्रम्प अनेक देशांवर टॅरिफ बॉम्ब टाकत आहेत, तर दुसरीकडे चीनमध्ये व्यवसाय करणाऱ्या अमेरिकन कंपन्यांवरही लक्ष ठेवून आहेत. प्रथम ट्रम्प यांनी भारतासह जगातील सर्व देशांना शुल्क लादून डोकेदुखी वाढवली आहे तर दुसरीकडे आता त्यांनी स्वतःच्या कंपन्यांकडून पैसे वसूल करण्यास सुरुवात केली आहे. आपल्या वस्तु चीनला विकायच्या असतील तर त्यांना उत्पन्नाचा वाटा अमेरिकन सरकारला देण्याचे ट्रम्प यांनी आदेश दिले आहेत आणि यासाठी सरकारचा वाटाही औपचारिकपणे निश्चित केला आहे.

डोनाल्ड ट्रम्प यांनी चिप बनवणाऱ्या कंपन्या Nvidia आणि Advanced Micro Devices वर हा नियम लागू केला आहे, पण भविष्यात आणखी कंपन्यांना लक्ष्य केले जाऊ शकते. मीडिया रिपोर्ट्सनुसार, चिप उत्पादक कंपन्या Nvidia आणि AMD यांनी चीनला होणाऱ्या निर्यात उत्पन्नाच्या 15% सरकारला देण्याचे मान्य केले असून आता निर्यात परवाने मिळवण्यासाठी या कंपन्यांना अशा हास्यास्पद अटी स्वीकारण्यास भाग पाडले जात आहे. यानुसार आता ट्रम्प प्रशासनाने म्हटले आहे की कंपन्यांनी त्यांच्या कमाईचा काही भाग सरकारला दिला तरच त्यांना निर्यात परवाने दिले जातील.

अमेरिकन सरकारने Nvidia च्या H20 चिप आणि AMD च्या MI308 चिपवर हा नियम लागू केला आहे. हा खूप मोठा निर्णय असल्याचं तज्ज्ञांचे म्हणणे आहे. दोन्ही कंपन्यांना त्यांच्या महसुलातील 15% रक्कम सरकारला द्यावे लागणार असून ट्रम्प सरकारने आता प्रत्येक कंपनीसोबत अशा प्रकारे सौदेबाजी सुरू केल्याचे यावरून स्पष्ट होते. तसेच यामुळे एका नवीन प्रकारचे व्यापार युद्ध सुरू होण्याची शक्यताही नाकारता येत नाही. याबाबत Nvidia ने निवेदन जारी केले आणि म्हटले आहे की जगभरातील मार्केटिंगसाठी त्यांनी अमेरिकन सरकारच्या नियमांचे पालन करण्याचे मान्य केले आहे. यामुळे कंपनी चीनला H20 चिप्स निर्यात करू शकतील, जे अनेक महिन्यांपासून रखडले आहे. ट्रम्प प्रशासनाने म्हटले आहे की अमेरिकेच्या निर्यात नियंत्रण नियमांनुसार चीनच्या तंत्रज्ञान क्षेत्राला हानी पोहोचवण्यासाठी या चिप्सची निर्यात देखील थांबवता येते. 

याआधी अमेरिकेने ‘राष्ट्रीय सुरक्षे’च्या नावाखाली Nvidia च्या H20 चिप्सवर बंदी घातली होती. कंपनीने ही चिप विशेषतः चिनी बाजारपेठेसाठी बनवली होती, जेव्हा 2023 मध्ये जो बायडन सरकारने चीनमध्ये सेमीकंडक्टरच्या निर्यातीवर बंदी घातली होती. त्यानंतर एप्रिल 2025 मध्ये ट्रम्प सरकार आल्यावर त्यांनी पुन्हा एकदा या चिपच्या निर्यातीवर बंदी घातली तर, आता काही अटींसह पुन्हा परवानगी देण्याचे सांगितले जात आहे.