xtreme2day 20-03-2025 19:14:36 7779029
ऐतिहासिक महाड मध्ये भीमसृष्टी उभारणार - सामाजिक न्याय मंत्री संजय शिरसाट चवदार तळे सत्याग्रहाचा 98 वा वर्धापन दिन सोहळा उत्साहात संपन्न महाड ( डॉ. जयपाल पाटील यांजकडून ) - भारतरत्न डॉ.बाबासाहेब आंबेडकर यांच्या जीवन कार्याची माहिती देणारी भीमसृष्टी महाडमध्ये उभारण्यात येईल, यासाठी लागणारा सर्व निधी उपलब्ध करून देण्यात येईल अशी घोषणा सामाजिक न्याय मंत्री संजय शिरसाट यांनी केली. महाड येथे समाजाला समानतेचा व समतेचा संदेश देणाऱ्या चवदार तळे सत्याग्रहाचा 98 व्या वर्धापन दिना निमित्ताने सामाजिक न्याय मंत्री संजय शिरसाट व रोहयो मंत्री भरत गोगावले यांनी डॉ.बाबासाहेब आंबेडकर यांच्या पुतळ्यास पुष्पहार अर्पण करून अभिवादन केले. यावेळी सामाजिक न्याय विभागाचे सचिव हर्षदीप कांबळे, जिल्हाधिकारी किशन जावळे, जिल्हा परिषद मुख्य कार्यकारी अधिकारी डॉ.भरत बास्टेवाड,समाज कल्याण अधिकारी सुनील जाधव, डॉ.भदंत राहुल बोधी, यांसह वरिष्ठ अधिकारी उपस्थित होते. राज्य शासनाच्या वतीने यावेळी हेलिकॉप्टर मधून चवदार तळे परिसरावर पुष्पवृष्टी करण्यात आली. चवदार तळे सुशोभिकरणासाठी यापूर्वीच घोषित झालेल्या 7 कोटी रुपयांच्या तसेच राजर्षी शाहू महाराजांच्या स्मारकाच्या तीन कोटी रुपयांची कामे तातडीने सुरू केली जातील, असेही श्री.शिरसाठ यांनी सांगितले. चवदार तळे येथील पाण्याच्या शुद्धीकरणासाठी फिल्टरेशन प्लांट लावण्यात येईल असेही त्यांनी यावेळी सांगितले. यावेळी मंत्री भरत गोगावले यांनी चवदार तळे सत्याग्रहाच्या शतकपूर्ती वर्धापन दिनासंदर्भात शासन तातडीने मंत्रिमंडळाच्या उच्चस्तरीय बैठकीमध्ये कार्यक्रमाची निश्चिती करण्यात येईल असे सांगितले. चवदार तळे सत्याग्रहाच्या 98 व्या वर्धापन दिनाला संपूर्ण देशभरातून लाखो अनुयायी दाखल होण्यास सुरुवात झाली आहे. येणाऱ्या सर्व भीम अनुयायांना सोयी सुविधा उपलब्ध व्हाव्यात यासाठी नगरपालिका प्रशासन आणि जिल्हा प्रशासनाने चोख व्यवस्था केली आहे.
