IIIT नागपूरच्या विद्यार्थी प्रशासन परिषदेच्या महासचिवपदी अपूर्व मुंदडा यांची निवड; छत्रपती संभाजीनगरचा झेंडा उंचावला!

Xtreme Today   30-07-2026 13:49:35   14265218

IIIT नागपूरच्या विद्यार्थी प्रशासन परिषदेच्या महासचिवपदी अपूर्व मुंदडा यांची निवड; छत्रपती संभाजीनगरचा झेंडा उंचावला!

नागपूर (प्रतिनिधी) - इंडियन इन्स्टिट्यूट ऑफ इन्फॉर्मेशन टेक्नॉलॉजी, नागपूर (IIIT Nagpur) येथील विद्यार्थी अपूर्व मुंदडा यांनी केली आहे. विद्यार्थी प्रशासन परिषद (Student Governance Council – SGC) निवडणूक २०२६–२७ या वर्षासाठी त्यांची महासचिव (General Secretary) या प्रतिष्ठेच्या पदावर निवड झाली असून, या यशामुळे संभाजीनगरच्या शैक्षणिक परंपरेत आणखी एका मानाच्या पानाची भर पडली आहे. छत्रपती संभाजीनगरच्या शैक्षणिक व सामाजिक क्षेत्रासाठी अभिमानाची बातमी ठरावी अशी उल्लेखनीय कामगिरी केली असल्याने त्याचे कौतुक केले जात आहे.

IIIT नागपूरच्या निवडणूक समितीने जाहीर केलेल्या अधिकृत निकालानुसार, दि. २८ जुलै २०२६ रोजी शैक्षणिक इमारतीतील परिषद सभागृहात (Conference Hall) सर्व उमेदवार आणि विद्यार्थ्यांच्या उपस्थितीत निकाल जाहीर करण्यात आले. त्यानंतर हे निकाल संस्थेच्या ऑनलाइन माध्यमावरही प्रसिद्ध करण्यात आले. या निवडणुकीत विद्यार्थ्यांनी मोठ्या उत्साहाने सहभाग नोंदवून लोकशाही मूल्यांवर आधारित, शांततापूर्ण आणि पारदर्शक निवडणूक प्रक्रियेला यशस्वी केले.

अपूर्व मुंदडा हे छत्रपती संभाजीनगर (पैठण ) येथील ज्येष्ठ पत्रकार, विक्रांद टाइम्स  आणि  अग्रसेन टाइम्स चे संपादक अरुणकुमार एस. मुंदडा यांचे चिरंजीव आहेत. पत्रकारितेतील सामाजिक बांधिलकी, प्रामाणिकपणा आणि लोकहिताची परंपरा लाभलेल्या कुटुंबातील अपूर्व यांनी आपल्या गुणवत्तेच्या, नेतृत्वक्षमतेच्या आणि सातत्यपूर्ण परिश्रमांच्या बळावर देशातील नामांकित तंत्रज्ञान संस्थेत विद्यार्थी नेतृत्वाची धुरा आपल्या खांद्यावर घेतली आहे.

सध्या तृतीय वर्षात शिक्षण घेत असलेले अपूर्व मुंदडा हे केवळ अभ्यासातच नव्हे, तर नेतृत्वगुण, संघटन कौशल्य आणि विद्यार्थ्यांशी सातत्याने संवाद साधण्याच्या वृत्तीमुळे सर्वांचे लक्ष वेधून घेत आहेत. प्रखर बुद्धिमत्ता, अपार मेहनत, सकारात्मक दृष्टिकोन आणि अत्यंत मनमिळावू स्वभाव ही त्यांची जमेची बाजू मानली जाते. त्यामुळे विद्यार्थ्यांचा व्यापक विश्वास संपादन करण्यात त्यांना यश आले असून, महासचिवपदासाठी त्यांची निवड ही त्यांच्या व्यक्तिमत्त्वाचा आणि कार्यक्षमतेचा गौरव मानली जात आहे.

तंत्रज्ञान शिक्षणाबरोबरच विद्यार्थी कल्याण, शैक्षणिक गुणवत्ता, सांस्कृतिक उपक्रम, नवोपक्रम आणि संस्थेतील सर्व विद्यार्थ्यांच्या हिताचे प्रश्न प्रभावीपणे मांडण्याची जबाबदारी आता अपूर्व यांच्या खांद्यावर आली आहे. त्यांच्या नेतृत्वाखाली विद्यार्थी प्रशासन परिषद अधिक परिणामकारक आणि विद्यार्थीकेंद्री कार्य करेल, असा विश्वास विद्यार्थी वर्गातून व्यक्त होत आहे.

अपूर्व मुंदडा यांच्या या उल्लेखनीय यशाबद्दल छत्रपती संभाजीनगरातील पत्रकार, शिक्षणतज्ज्ञ, सामाजिक कार्यकर्ते तसेच विविध क्षेत्रातील मान्यवरांकडून त्यांचे अभिनंदन होत आहे. विक्रांद टाइम्स/अग्रसेन टाइम्स तसेच xtreme media network परिवारातर्फे अपूर्व मुंदडा यांचे मनःपूर्वक अभिनंदन करण्यात येत असून, त्यांच्या उज्ज्वल शैक्षणिक आणि नेतृत्वपूर्ण वाटचालीस हार्दिक शुभेच्छा व्यक्त करण्यात येत आहेत. त्यांच्या या यशामुळे छत्रपती संभाजीनगरच्या नव्या पिढीसमोर कर्तृत्व, गुणवत्ता आणि नेतृत्वाचा प्रेरणादायी आदर्श निर्माण झाला आहे.